قصة المحنة ديالي

 قصة محنتي

انا الصديق من بن احمد نواحي دبال سطات، خدام فواحد الشركة ديال الخشب فالرباط، المشكلة ديالي مع عالم الجن خايبة شوية حيث بسبابهوم وقعو ليا بزاف ديال المشاكل وجراو عليا من الخدمة الاولى، كنت كانمشي للبلاد فالاعياد والمناسبات ولا وقتما رشقات ليا، هادشي وقع ف 2005 كنت مشيت نشوف مالين الدار، وفالليل كانمشي نقصر مع الدراري ديال الدوار وكانلعبو الكارطة ولا نمشيو للعراسات مكاندخل للدار حتى 2 ديال الليل وبعض المرات 3 واحد نهار بقيت مع دراري كانلعبو الكارطة وناشطين شوية جبدنا الموضوع ديال الجن وكلها يلغي بلغاه وانا بصراحة كنت كانسمعهوم وكانضحك حيت مكانأمنش بداكشي، هوما كايعااودو وانا كانضحك بحال الى كايعاودو شي نكتة اللمهم قرب الفجر يودن صافي تفارقنا كلها مشا لدارهوم، فديك الليلة كانت الgمرة غايبة والدنيا ضلام كثر من القياس وكنت شاد واحد البيل فيدي وغادي كانتحسس طريق لا نطيح فشي حجرة، وبلا ما نرد البال كانهز راسي كانلقا واحد الخيال قدامي، كانت سيدة لابسة البيض و واقفا قدامي سادة طريق، انا يتسحاب ليا غير واحد من الدراري بغا يديرها بيا بديت نسب فيهوم ونضحك و والو مكاين حتى حس كاندوي غير بوحدي، بديت نتعصب هزيت واحد الحجرة باش نضربهوم يديرو ليا الطريق حيث كان يسحاب ليا ي واحد من الدراري ، واالله ما جيت فين نشير بديك الحجرة حتا كانحس براسي ترفعت يعلم الله شحال فالسما وترضخت للارض بالجهد غوت اييي ظهري بحال هكا والله العظيم، وكانشوف ديك المرأة ولات لابسة لكحل ما بقاتش لابسة البيض وجايا عندي ما عقلت على راسي حتى لغد ليه ضرباتني الفيقة فسبيطار المخزن فبن احمد، لقيت الوالدة والوالد حدايا و واحد ختي والوالدة مضيومة مسكينة، بديت نتكلم ونقول اش وقع واش كاندير هنا قالت ليا ختي سي محمد ولد بوشعيب لقاك فالصباح مليوح قدام الدار وجا علمنا وجبناك لهنا اشنو وقع ليك الباارح,.؟ قلت ليها والله ما عقلت انا اللي عاقل عليه ان شي حاجة كانت واقفة ليا فالطريق بالليل وبغيت نضربها بالحجر ولقيت راسي هنا، قالت باللي حتى اثر ما كان فديك البلاصة من غير الاثر ديال سباطي، سمعت ديك الهضرة تبورشت وبديتت نخمم فداكشي اللي وقع باش نفهم والو بغيت نحرك رجليا شوية وكانت الصدمة، ما حسيتش برجليا نهائيا عييتت ما نحاول نحرك فيهوم والو وليت مشلول، ما تيقتش داكشي اللي كانشوف وبديت نغوت ونضرب راسي بحال لحمق وامي مسكينة كاتبكي والوالد كايحاول يصبرني ويقول لي عليك بالصبر اوليدي هذا قدر االله، جاو دكو ليا شي ابراة وما عقلت على راسي حتى غد ليه فقت بديت نبكي عاوتاني ونتخيل هادشي اللي وقع ليا غير بسباب حجرة نويت نضرب بيها بنادم سد عليا طريقي، دوزتت فالسبيطار 10 ايام وخرجوني على كرسي متحرك وداوني للدار بقيت هايم وغير كانبكي ونتفكر داكشي اللي وقع مكانبغي لا ناكل ولا نشرب كانتسنا غير الموت حيث كنتت انا هو المعيل ديال الاسرة وهاددشي اللي وقع كايعني انني ما بقيتش غانخدم ولا نتتزوج و وو المهم بقيت هكاك واحد المدة الامور عادية مكانشوف والو حتى لواحد الليلة بديت نشوف ديك المرأة مولات الحيال اللي وقفات ليا فالطرق كانشوفها فالمنام كاتجي حتى لحدا راسي وتريح فيه وتبدا تضحك وكانفيق مخلوع وفالليلة الثالثة فقت من الخلعة ولقيتها حدا راسي بصاح غوت بالجهد ديالي جات لوالدة مسكينة كاتجري قاتقرا القرآن وانا باقي كانشوف ديك السيدة قدامي، كانغوت كانقول ليها شكون هاديك امي وهي كاتقول ليا رجوع الله اولدي راه مكاين حد ديك الساعة الوالد سافر، بقيت على ديك الحالة حتى داني نعاس غير خرجات الوالدة جات عاوتاني هاديك فيقاتني قالت لي بلا ما تغوت راه ما عندك ما تصور وحسن ليك شوف وسكت، قلت ليها شكون نتي قالت لي ماشي شغلك، اش بغيتي عندي ماشي شغلك اللي كانقول ليها كاتقولي ماشي شغلك، بغيت نغوت ما قدرت كانشوف فيها كاتدور حدا راسي وما قادر ندير والو، 15 يوم وانا علا ديك الحالة ويوميا كاتجي حدا راسي وكاتدير داكشي اللي كادير فواحد الليلة ضرباتني الفيقة وكولي عرقان وفيا العطش بغيت نغوت على ختي تجيب ليا نشرب ما قديت بانت ليا هاديك عاوتاني قالت لي خلي ختك تنعس ونوض جيب لراسك لما، ما عرفتش كيف درت حتى وقفت على رجلي على رقبتي اخوتي الى وقفت على رجلي عادي ما تيقتش راسي خاصة الطبيب قال لي ما عمرك تقدر تمشي اول حاجة درتها جريت للبيت ديال الوالدة فيقتها وقلت ليها بديت نمشي بديت نمشي وهي مسكينة ما متيقاش وكاتبكي وختي حتا هي، والله الى من الفرحة خرجت فالضلام كانجري فالدوار بحال الهبيل وكانغوت حتى صبح الحال، رجعت للدار و وصلات لخبار للناس فالدوار بداو يجيو يباركو ليا ويحمدو الله على سلامتي وانا بحال الهبيل ما مديهاش فيهوم كانفكر غير فهاديك اللي كاتجيني بالليل واشنو علاقتها بيا، نعست فديك الليلة وكنت متأكد باللي غادي تجي وفعلا داكشي اللي وقع جات فيقاتني فالليل وريحات حدايا وهاد المرة كان معاها واحد الدري صغير، بقات كاتشوف فيا وتهضر مع داك الولد قالت لي هذا ولدي، قلت ليها شكون نتي قالت لي انا مسلمة بحالك، وانا اللي درت ليك ديك الضربة قلت ليها وعلاش قالت لي حيث بغيتي تضربني وتضرب ولدي وماللي شفتيني ما سميتيش ربي اللي خلقك، انا لساني تعقد ما عرفت اش نقول مازال قالت لي واحد الكلمة ما عمري ننساها، قالت لي حمد الله تلاقيتي معايا مسلمة بحالك وكانعرف الله اما ما عمرك تزيد فيها نهار، قالت ليا هاد الكلام ومشات ومن داك النهار ما بقيت شفتها والله العظيم، مشيت عند الفقيه ديال الجامع ماللي عاودت ليه اش وقع عرفها وقال لي باللي شافها شي 2 دريال المرات وشافوها ناس اخرين وما عمرها اذات شي واحد غير انا اللي بغيت نضربها وضرباتني.

رجعت للخدمة ديالي ما بغاوش يدخلوني قالو لي تعطلتي عاودت ليهوم المشكل والو تما هزيت حوايجي جيت للرباط ودابا خدام فواحد الشركة ديال الخشب هنا، الى يومنا هذا ديما وقتما تفكرت هادشي اللي وقع كانحمد الله ونشكروا حيث سالا بهاد الشكل

النهاية