ﺍﻟﺠﺰﺀ ﺍﻷﻭﻝ
كولشي عارف بلي فالغربة كانعيشو حياة صعيبة مكاين معامن تهضر و عايش ديال راسك و كاتقتلك الوحدانية .
هنا مكايناش ديك الحياة الاجتماعية و تخرج تلاقا مع عشرانك و تمشي عند الفاملية و الجيران ...هنا كل واحد شاد تيقارو و هي من واحد الناحية زوينة تبعد من بنادم و المشاكيل ... انا عايش هنا بوحدي فواحد الدار صغيرة فالنواحي ديال المانيا انا خدام فالمجال ديال الازياء و عزيزة عليا خدمتي و كنخدم غير نص نهار و كانزيد سوايع من عندي ... و كنرجع بالليل للدار كناكل و كنعس و فالويكاند عزيز عليا نقرا الروايات و مرة مرة كنحاول نكتب قصص ...
ولكن ملي نتاشر هاد المرض الله احفظنا و يحفظكوم منو وليت كالس غير فالدار مكانخرج فين حيت حتى الخدمة تحبسات و معارفش امتى غاترجع الحياة الطبيعية..
اش هادشي اسيدي ربي مالقيت ماندير الخدمة لي كنت كانلاهي بيها راسي راه حبسات و مقادر نخرج فين مكانشوف حد و مكايشوفي حد ... دازت دبا 8 ايام و قتلني الملل ولكن النهار التاسع طاحت عليا واحد الفكرة ...
علاش مانقراش شوية على الجن منها نيت ندوز شوية ديال الوقت و حتى بحال هاد الروايات كايكونو زوينين حيت فيهوم الاساطير و الخرافات هي هاديك دخلت لكووكل و بقيت كنقلب و لقيت بزاف ديال العناوين بحال ﻛﻴﻒ ﺗﻜﻮﻥ ﻣﻦ ﻣﻌﺸﺮ ﺍﻟﺠﻦ ﻭﻛﻴﻒ ﺗﻘﻮﻡ ﺑﺎﻹﺗﺼﺎﻝ ﻣﻌﻬﻢ بديت كنضحك و قلت مع راسي هادو لي كيتيقو هادشي صافي هرب ليهوم و لقيت تاني ﺍﻟﺠﻦ ﺍﻟﻄﺎﺋﺮ ﻭﺍﻟﺠﻦ ﺍﻟﻤﺘﺴﻠﻂ ﻭﺻﻐﺎﺭ ﺍﻟﺠﻦ ﻭﺍﻟﺸﻴﺎﻃﻴﻦ وقلت وانا ميت بالضحك بغيت جنية هي و ولدها باش نيت نحيد هاد الملل ..
صافي طفيت البيسي و مشيت نعس و غير غمضت عيني و انا نسمع واحد الصوت خفيف عيط ليا بسميتي
وانا نوض بالزربة مخلوع و بقيت كنشوف فالبيت و نقلب بعيني و مالقيت والو اش هاد الصوت و انا نمشي لكوزينة باش نشرب و طليت من الشرجم و كان البرد و العجاج ديك الليلة شوية بان ليا شي واحد طالع لواحد الشجرة قدام الدار انا شفتو يسحاب ليا غير شي سنجاب حيت كاينين هنا و كتار ... صافي ماتسوقتش و انا نرجع لبلاصتي و الغد ليه فقت مشيت ديريكت للبيسي و بديت كنقلب تاني فالمواقع ديال الجن و الشياطين و بديت كنتعمق فيه و دخلت حتى للديب ويب حيت فيه هادشي بزااف .... يتبع
ليست هناك تعليقات:
ملحوظة: يمكن لأعضاء المدونة فقط إرسال تعليق.