بديت كنغوط وكنسمع لاله جوهرة حتى هي كتغوط..ديمارا الشيفور وملي حسيت بالطوموبيل تحركات عاد رجعات ليا الروح.. -اش هادشي ياربي.. جاوباتني لاله جوهرة:-سكتينا دبا..راه ضرني راسي بغواطك.. سكت وانا كنشوف فالطريق..اختي نعسات في حضني..وانا كنقرا المعوذتين..داني نعاس وانا نحس بشي حد كيحركني..حليت عيني لقيتو صالح:-هييي انت فيقي راه وصلنا..هزي الشانطة.. قفزت حيت كنت مزالة مخلوعة وانا نعاون لاله حتى خرجات من الطوموبيل بقيت هازة صاكها..في يد واختي الصغيرة فيد..شفت قدامي كتبان ليا واحد الدار كبيرة..وسط واحد الجردة..بقيت تابعة لاله جوهرة وهي قدامي كتمايل..ههه سكرات ثاني..فاش كتجيها الحالة كتشرب واخا فاسوء الحالات..اشمأزيت منها..وانا تابعاها..دخلنا للدار واخا ماشي شي حاجة فخمة..دخلت لاله لواحد البيت عاونتها حتى نعسات بلاصتها زولت ليها صباطها.واختي كتقولي يالله..اما انا بقيت كنشوف فالخلخال وانا نبغي نزولو ليها من رجليها ولكن مابغاش اتحل..بقيت كنحاول معاه ولكن لعجب..مابغاش اتحل هادشي..عصبني!! وانا نخليها..هزيت اختي لي مبوقة بالنعاس مشيت للواحد البيت فرشت فالارض وانا نعس غمضت عيني حيث باينة غتصبح عليا..وانا كنتقلب باش ايجيني للنعاس..سمعت شي صوت بحال شي حد كيغني..بصوت حزين..جلست وانا كنفكر:-شكون ممكن اكون كيغني؟لاله جوهرة نعسات!ياكما تكون فاقت؟ خرجت من البيت كنتسلت..قربت لبيت لاله جوهرة والصوت كيقوى...حطيت وذني على الباب وهو يمشي داك الصوت..حليت الباب بشوية وطليت لاله ناعسة..وسط الظلام..كان الخلخال كيبان اللمعان ديالوو..تحسرت عليه كان يمكن اكون من نصيبي..رجعت لبيتي تكيت وداني النعاس.. في الصباح بكري مشيت للكوزينة طليت من الشرجم وانا كنشم واحد الريحة خانزة..بحال ريحة الجيفة-اكرمكم الله-......
في الصباح بكري مشيت للكوزينة طليت من الشرجم وانا كنشم واحد الريحة خانزة..بحال ريحة الجيفة-اكرمكم الله-.....خرجت جيهة الجردة وانا كنشمشم وكنقلب وسط الربيع..لقيت لكلاب مجموعين على شي حاجة خرجت عيني نشوف وهي تبان ليا شي حاجة بيضاء .. وانا ندخل للدار كنجري..وقفني صالح:-امالك مبرزطانا عالصباح!كاين شي فطور؟ -جري جري راه الكلاب فالجردة ماعرفت علاش مجموعين.. خرجنا كنجريو للبلاصة فين كانو ولكن مالقيت والوو-ناري راه كانو هنا هنا..شوف هاهي البقعة ديال الدم.. -دخلي للدار دغيا راه عصبتينا الصباح هذا..راه لاله جوهرة الى مالقاتش الفطور راكي عارفة شنو كيتسناك!تفكرت الفطزر وانا ندخل للدار بالجرا.وجدت الفطور وانا نديه للبيت ديال لاله جوهرة.حطيت ليها الفطور وبغيت نخرج وهي تعيط ليا:-شوفي انت اليوم بغيت كولشي اكون واجد راه غنغني عندي كليان مهم هنا.. استغربت:-هنا فهاد.الفيلاج؟ -اه هنا راكي ما فاهما والو سكتي وديري لي قلت ليك عليه..راه غتلقاي الخدامة للتحت عاونيهم راه بغيت كولشي ادوز مزيان.. -واخا الاله كوني هانية.. خرجت من عندها ومشيت عاونت الخدامة وجدنا الماكلة وجا الاوركسترا..بداو الضياف كيدخلو واختي الصغيرة نعستها وسديت عليها البيت كيف كتعرفو ماكاينة ثقة..مشيت عاونت لاله لبسات وتقادات كتبان كيف شي ملكة.. -بصحتك الاله كتباني منورة.. -عارفة هادشي..كولشي واجد؟ -اه الاله كولشي واجد.. -سمعت قبيلة كيقولو الماء ديال العين زوين! -اه الاله هادشي لي سمعت الخدامة كيقولو.. -ممم اوا انا تشهيتو!سيري سقي ليا الماء.. -ولكن الاله الظلام غيطيح وانا مامخالطاش.. -ماكاين ما ولكن..دبا سيري مع شي حد من الخدامة وسقي ليا الماء.. وراه بغرامتك كوني هانية.. اوا حنيت الراس وهبط طلبت واحدة من الطباخات تمشي معايا.
هزيت واحد القرعة ودخلنا للدوار..الطبيعة زوينة ولكن الدوار كيبان لي خاوي..استغربت وانا نتلفت للمراة لي معايا.. -سمحيليا نسولك..فين ناس الدوار؟ شافت فيا..شوفة غريبة وهي تقوليا:-هذا حالهم..زيدي تبعيني نمشي نطل على بنتي راه خليتها ناعسة فالدار.. -واخا مانتعطلوش راه بغيت نسقي قبل ما يطيح الظلام.. تبعتها وحنا كننقربو لواحد الدار..حلات الباب وهي دور عندي:-تسناي راني غنرجع دبا.. دخلات وانا بقيت كنتمنظر فهاد الدار وكفاش الناس اقدرو اعيشو هنا..بقيت كنسمع شي غوات وانا نقرب من الباب هاد الغوات جاي من الدار قرت للشرجم باش نشوف كتبان ليا السيدة كتغوت على واحد البنت صغيرة.وهي طيح البنت وبقات تتركل انا تخلعت ورجعت حدا الباب..شوية خرجات السيدة قالت ليا:-سمحيليا ابنتي ولكن بنتي الصغيرة طاحت مانقدرش نمشي معاك.. انا لقيتها من الجنة والناس وانا نهز قرعتي ومشيت كنجري بعدما نعتات ليا فين جا العين..بقيت غادية وكنتلفت وقت المغرب هذا وانا ماسمعت حد أذن..العجب هذا..تمشيت فواحد الطريق وسط الخروب حيت هادي طريق العين..وصلت وانا نحط القرعة وبديت تنسكي الماء..شربت منوو مانعاودش ليكم على مذاق وعلى برودية فيه..بقيت كنسقي نعمر القرعة وكنطلع السنسلة وكيتسمع واحد الصوت فهاد الخلاء..عمرت القرعة وبدا كيطيح الظلام..حسيت بالخوف حيث بوحدي هنا..وبنات الدوار ماجاوش اسقيو..بقيت غادية وكنشوف فجنابي..شوية كنسمع السنسلة ديال العين..تلفت وانا كنشوف واش جا شي حد اسقي الماء..ولكن ما كان تا شي واحد..حسيت بالنسمة الدافئة فعنقي.وانا نوقف.وكنتنفس بالجهد..تمشيت ثاني وانا كنزيد نسمع صوت السناسل بحال صوت الخلخال..تلفت مابان ليا حد ورايا..غير كنتمشى كنسمع صوت الخلخال..تخلعت وبقيت كنجري كيف الحمقة ماعرفت فين كنحط رجلي.في الظلام.....
ليست هناك تعليقات:
ملحوظة: يمكن لأعضاء المدونة فقط إرسال تعليق.